السلام عليكم و مرحبا بكم فمجلة “رجل مغربي”. كلنا عرفنا الريدبيل أو الحبة الحمراء و بلي كتهم سيكولوجية الإناث بالدرجة الأولى و من بعد كتعلمك كيفاش تعامل نتا كرجل باش تحافظ على إطارك الذكوري لي خلقك عليه الله ولكن واش عمرك عرفتي الفرق بين الحبة الحمراء و الحبة الشاملة ؟ هادشي لي غادي نعرفو :
شنو هي الحبة الحمراء بعدا و علياش كترتاكز بالضبط ؟
عمرك سمعتي واحد المثل مغربي كيقول : سمع لي يبكيك و ماتسمعش لي يضحكك ؟ بطبيعة الحال كاملين سمعناه , ولكن عمرنا دخلنا فدهاليز هاد المثل الذهبي هادشي علاش غادي نقسمو المثل على زوج جمل لي أولها , “سمع لي يبكيك”. أول كلمة هي سمع يعني كاينة شي حقيقة جاية فالطريق و هاد الحقيقة كيدايرة ؟ كتبكي أه تماما . علاش كتبكي حيت بكل بساطة مكتعجبناش يعني فيها شي حاجة لي كتضرنا ولكن فمصلحتنا واخا قاصحة هادشي علاش كتبكينا .
ندوزو للجملة الثانية لي بدات بالنهي وهي ” ماتسمعش ” يعني أي حاجة كتضحكك و كتخليك غا حال فمك و فرحان متسمعش ليها حيت غير غادي تغيبك على الواقع لي بصح نتا فيه و هاد الحقيقة لي كتضحك ماغاديش تخليك تزيد للقدام .
تماما هذا هو الفرق بين الحبة الحمراء و الحبة الزرقاء : الحبة الحمراء كتخليك تعرف الحقيقة المرة و شحالمعاك فالساعة ولكن الحبة الزرقاء كتخليك تعيش فأحلام وردية مزيفة . الحية الحمراء وراتك شحال من حاجة فسيكولوجية الأنثى لي مكنتيش عارفة وهاد الحقائق ضروك حيت كانت عندك واحد الصورة نمطية على الأنثى بلي ملاك و بلي أي حاجة دارتها خصنا نميكو عليها وهانية … و ما إلى ذلك . من بعد كتقوليك الحبة الحمراء جمع راسك كيفما فنهاية الجامعية كيكون هناك تنقيط حتى نتا كذلك عندك تنقيط و خصك تخدم و تطور من راسك باش يولي عندك تنقيط عالي حتى نتا كرجل عال القيمة .
الحبة الشاملة واش فحالها فحال الحبة الحمراء ؟
مني فهمنا بعض الشيء أسس الحبة الحمراء و هي أول حاجة خصك تبنها فحياتك إلا بغيتي تدوز للحبة الشاملة . فالحبة الشاملة مكنبقاوش نهضرو على شي حاجة عندها علاقة بالأنثى بل كتركز على نفسك ثم نفسك ثم نفسك . الحبة الشاملة فحالا قلتي سطاج الوحش فتطوير الذات يعني الا كانو مزال كيحركو فيك ردود الإناث شي حاجة بلا ماتقرى عليها و متحاولش حتى تضبط المعاير ديال الحبة الحمراء و تكون رجل ريدبيلي متوازن النفس , ديك الساعة مرحبا بيك فالحبة الشاملة . لأنك فهاد المرحلة المهم لي غايولي عندك ماشي هو تهيمن ولا تكون سيغما … ولكن الأهم هو تعمر الحساب البنكي ديالك و تعيش حياة مزيانة و كريمة و تحقق الأهداف ديالك الدينية و الدنيوية . أما المراحل السابقة غاتكون ديجا ضبطتيهم مزيان حيت مايمكنش تكون مزال بيطا و كيتحكمو فيه المشاعر و باغي تنتقل للحبة الشاملة .
أخيرا وليس آخرا :
الحبة الحمراء و الحبة الشاملة ماشي زوج حوايج منفصلين باش متمشيش غالط . بل هوما مرحلة تابعة الأخرى و أول مرحلة فتطوير الذات هي الحبة الحمراء لي كتعلمك فالجزء الأول ديالها سيكولوجية الأنثى و كيفاش تعامل معها و كيفاش تنقذ راسك من اختباراتها السامة , مرورا بشق التعرف على الذات الرجولية و كيفاش تحكم فراسك مزيان و تكون متوازن نفسيا و المشاعر ديالك يكونو فوضع الطيران و هادشي كيجي من بعد ماتخطى مرحلة الغضب لي غادي نفصلو فيها فمقال آخر إن شاء الله, من بعد كتنتقل بصفة رسمية للحبة الشاملة و كتولي مهتم غير بنفسك فقط و كيفاش اطور راسك أكثر و أكثر .
كان معاكم أدمن موقع “رجل مغربي” . جميع الحقوق محفوظة , ممكن لأي واحد يهز هاد المقال ويعاود ينشرو مع ذكر المصدر وشكرا .
